Home Sosial & Politika PM Esplika Rezultadu OJE Ba PR Lu Olo, TMR: CNRT Vota Kontra, Sinal AMP Laiha Ona

PM Esplika Rezultadu OJE Ba PR Lu Olo, TMR: CNRT Vota Kontra, Sinal AMP Laiha Ona

240
0
SHARE
PM Esplika Rezultadu OJE Ba PR Lu Olo, TMR: CNRT Vota Kontra, Sinal AMP Laiha Ona

Caption: Primeiru Ministru Taur Matan Ruak. [Foto: Santina Lucia da Costa | 20.01.2020]

Primeiru Ministru, Taur Matan Ruak hasoru malu ho Presidente da Republika, Francisco Guterres Lú Olo hadi hatoo konaba rezultadu hosi debate Orsamentu Jeral Estadu 2020, ne’ebe la pasa iha Parlamentu Nasional.

Hatan ba jornalista TAFARA.TL relasiona ho bankada CNRT ne’ebe la afavor, karik ida ne’e hanesa traisaun? Taur Matan Ruak hatan katak Aliansi Maioria Parlamentar [AMP], iha komprimisu importante katak programa governu tenke pasa, partidu tolu tenke vota hamutu no orsamentu tenke pasa.

“Orsamentu la liu no bankada CNRT mak vota kontra, ne’e sinal hatudu katak AMP laiha ona. Deputadu CNRT sira mak baku mate tiha AMP iha sesta feira semana kotuk. Hau husu deskulpa ba lideransa CNRT, PLP no Khunto nian, ba militantes no simpatizante hotu ne’ebe mak servisu naton hodi harii AMP, maibe infelismente deputadu CNRT sira baku mate tiha AMP iha sesta feira ne’e”, deklara Taur Matan Ruak, iha palacio prezidensia, 20/01.

Xeve governu ne’e hatutan katak, la hateten traisaun ba bankada CNRT maibe tuir deskursu hosi Xefe Bankada CNRT, Duarte Nunes ne’ebe hateten kandidatu nain hitu [7] ne’ebe Prezidente da Republika la fo posse no tanba Primeiru Minsitru sobu sistema.

“Hanesan kareta ida karik Prezidente da Republika  sobu tiha roda ida, Primeiru Minsitru sobu tiha kadera iha kareta laran, sira to’o mai fakar tiha minarai sunu tiha kareta, agora ida sunu tiha kareta mak salah ka sobu deit roda ho kadeira deit mak salah? Responsabilidade tolu ne’e ba deputadu CNRT nian iha Parlamentu Nasional, sira mak sobu AMP no hau hanesan Primeiru Minsitru, hau onradu ba konvite AMP nian no CNRT nian para lidera nasaun ida ne’e, hau agredese ba apoiu hotu, maibe hau hakarak hatoo ba deputadu sira katak hau la gosta presaun no centagen”, tenik Taur Matan Ruak.

Taur Matan Ruak mos informa ba jornalista sira katak nia prontu simu desizaun tomak ne’ebe sei hato’o hosi Prezidente da Republika, no Przidente Lú mos sei halo enkontru ho partidu sira hodi halo dialogu liga ho situasaun politika ne’ebe akontese dadauk. * [ Zevonia Vieira | TAFARA.TL | 20.01.2020 ]