Home Sosial & Politika Persentazen Feto Ho Difisiensia Iha FP Sedauk Iha, Faustino: Foin Mak Hahu Levantamentu de Dadus

Persentazen Feto Ho Difisiensia Iha FP Sedauk Iha, Faustino: Foin Mak Hahu Levantamentu de Dadus

93
0
SHARE
Persentazen Feto Ho Difisiensia Iha FP Sedauk Iha, Faustino: Foin Mak Hahu Levantamentu de Dadus

Caption: Feto ho Difisiensian Norberta Soares hosi Community Rehabilitation Network Organization. [Foto: Zevonia Vieira | 20.10.2019]

“Esperiensia hau rasik, bainhira vaga ruma loke iha parte governu nian, sempre hasoru difikuldade tanba kriteria sira ne’e, ho tamba mos feto ho difisiensia sira nia nivel konnesementu iha asesu ba edukasaun numeru sei minum”. Norberta

Numeru Partisipasaun feto ho difisiensia iha Funsaun Publika sedauk iha, Liu hosi seminariu konaba Oeferese Solusaun Hodi Aumenta Feto Sira nia Lideransa iha Nivel Munisipiu, orador hosi Prezidente Komisaun Funsaun Publiku, Faustino Cardoso Gomes hatudu nia aprezentasaun katak numeru partisipasaun feto iha funsaun publika total 34,6% iha nivel nasional, maibe sedauk inklui feto ho difisiensia, iha nivel municipal iha 32, 6% no kargu diresaun xefia iha 23, 2% deit.

Ho aprezentasaun refere, hetan preokupasaun hosi Feto ho Difisiensia, Norberta Soares, hosi Community Rehabilitation Network Organization ba TAFARA.TL hateten katak durante ne’e feto ho difisiensia sira sei hetan obstaklu barak iha partisipasaun iha funsaun publika, tanba konnesementu feto ho difisiensia iha nivel edukasaun nia numeru sei minimu tebes.

“Obstaklu boot bainhira apply iha vaga sira ne’e, nia kriteria ne’e dala barak hakerek saude ho mental ne’ebe diak, ida ne’e difikulta tebes bainhira feto ho difisiensia hodi ba apply. Esperiensia hau rasik, bainhira vaga ruma loke iha parte governu nian, sempre hasoru difikuldade tanba kriteria sira ne’e, ho tamba mos feto ho difisiensia sira nia nivel konnesementu iha asesu ba edukasaun numeru sei minumu, ida ne’e difikulta sira atu partisipa iha funsaun publiku”, tenik Norberta ba TAFARA.TL

Hosi preokupasaun hirak ne’e, Norberta espera katak iha futuru governu bele kria politika ne’ebe diak liu, atu nune’e la diskrimina partisipasaun feto ho difisiensia iha funsaun publika no mos iha nivel foti desizaun bele mos iha.

Iha fatin hanesan hatan ba preokupasaun hirak ne’e, Faustino Cardoso esplika ba TAFARA.TL katak, Komisaun Funsaun Publika, foin konklui ho levantamentu de dadus konaba situasaun ema ho difisiensia iha funsaun publika nivel municipio.

“Ita koalia konaba ema ho difisiensia, ita koalia konaba feto no mane, ne’ebe to’o ohin loron ami sedauk iha relatoriu final konaba rezultadu levantamentu de dadus ne’ebe mak foin konklui”, esplika Faustino iha hotel Ramelau

Faustino mos hateten Komisaun Funsaun Publika  [KFP] iha ninian politika no prioridade, wainhira tama mai iha 2015, KFP define prioridade iha prioridade nia leten, “ami hahu prioridade ne’ebe mais ezisjenti no agora ami tama ona iha prioridade oinsa atu atende lolos situasaun ema ho difisiensia iha Funsaun Publika, tanba ne’e mak komisaun halo atividade sira, halo workshop ho ema ho difisiensia, servisu hamutuk ho UN Women hodi halo treinamentu no seluk tan”, hateten Faustino.

Sekretaria Estadu Igualdade no Inkluzaun, Maria José da Fonseca Monteiro de Jesus iha dadalia ho TAFARA.TL esplika katak durante ne’e halo ona advokasia lubuk ida no  fungsaun publika mos asegura oportunidade hanesan ba ema ho difiensia. Iha Funsionalismu publiku, iha ona medidas balun atu asegura katak ema ho difisiensia mos labele hetan diskriminasaun tanba sira nia kondisaun fisika maibe tenke hare ba sira nia meritu no kapasidade, buat ida sedauk tetu katak laos hare deit ba ema nia nivel edukasaun, maibe hare hosi ema nia esperiensia. Klaru katak ema ho difisiena komunidade ne’ebe importante iha sosiadade atu partisipa.

“Ita hakbiit sira liu hosi formasaun sira ne’ebe mak governu organiza, liu hosi eventu sira ne’ebe mak organiza. Apoiru mos grupu feto ho difisensia sira hodi halo negosiu”, hateten SEEI

Norberta reprezenta feto ho difisiensia, iha esperansa boot atu bele partisipa iha dezenvolviment nasaun ida ne’e, atu lori nasaun ne’e ba oin ho kolektivu no laiha diskriminasaun, Norberta iha mehi katak feto ho difisiensia bele mos sai lideransa ne’ebe bele lori mudansa diak iha nasaun ida ne’e. * [ Zevonia Vieira | TAFARA.TL | 20.10.2019]