Home Internasional Governu Canada Fasilita Treinamentu GBA Plus ba Media, Setor Privadu no Membru APFTL

Governu Canada Fasilita Treinamentu GBA Plus ba Media, Setor Privadu no Membru APFTL

145
0
SHARE
Governu Canada Fasilita Treinamentu GBA Plus ba Media, Setor Privadu no Membru APFTL

Caption: Igualdade Jeneru, Ekuidade mak Aspeitu Nesesariu ba Dezenvolvimentu Sosio-Ekonomiku, (foto: Zelia | TAFARA.TL | 18.02.2020].

“Gender-Based Analysis Plus (GBA+) ko’alia kona-ba oinsa komprende problema no solusaun sira relasiona ho mudansa klimatika, edukasaun, oportunidade servisu no problema sira seluk ne’ebé bazeia ba prespestiva ema feto no mane husi fatin no grupu oin-oin.”

Lia ne’e hato’o husi fasilitador GBA+, Tracy Apoll ba TAFARA.TL hafoin atividade treinamentu Gender-Based Analysis Plus ba Média, Setor Privadu no Membru PFTL. Nia akresenta, GBA+ atu suporta instituisaun governu nomos organizasaun sira ne’ebé kria projetu no politika ba asuntu interesante sira, tanbá hatene kle’an kona-ba asuntu ne’ebé sira defini, lori impaktu saida no ba sé, nune’e bele dezeña programa, polítika no lejislasaun mak nesesáriu.

Iha treinamentu ne’e partisipante sira aprende kona-ba relasaun entre seksu no jéneru, jéneru no kultura nomós interseksionalidade ne’ebé ko’alia kona-ba seksu, rasa, etniku, relijiaun, idade, disabilidade, jéneru, jeografia, kultura, rendimentu, orientasaun seksual nomós edukasaun. Partisipasaun, igualdade jéneru, igualdade ekuidade, asesu ba oportunidade no rekursu mak hanesan sai mós materia aprendizajen iha treinamentu refere.

Partisipante sira mós aprende kona-ba GBA+ procces, hahu hosi identifika asuntu, challenge assumption, buka faktus, dezenvolve opsaun, elabora rekomendasaun, monitoriza, avalia, komunikasaun no dokumentasaun.

Tracy Apoll salienta, “treinamentu ida ne’e ba membru parlamentu foinsa’e, media no setor privadu balun, hau espera sira iha komprensaun kle’an kona-ba asuntu hotu-hotu. Nune’e, ba media sira hakerek historia tenke hanoin uluk, historia ne’e kria ba se, lori impaktu saida no se-se mak asesu. Ba Membru Parlamentu Foinsa’e karik bele hanoin kona-ba se mak inklui no la inklui iha politika no programa governu nian,” tenik Tracy.

Entretantu Rosa Sávio reprezentante empreza Ce’mill Group ne’ebé partisipa mós iha atividade refere sente katak materia hirak ne’ebe nia aprende importante tebes no iha ligasaun ho knar ne’ebé nia hala’o. Rosa hateten nia serbisu hamutuk ho ema ho diferente karakteristika, relijiaun, hanoin no buat oin-oin deit, maibé ne’e ekipa ida.

Iha fatin hanesan, Diretora Progamasaun no Produsaun GMNTV, Isabel Maria Fernandes de Jesus, hato’o agradese tanba bele hetan tan buat foun, koñese maluk sira husi instituisaun seluk. Partisipante ne’e hateten, “hau hanoin materia no esperiensia sira ne’ebé mak ohin sira fahe, ha’u senti benefisiu teb-tebes mai hau nia serbisu nomós ba instituisaun ka kompaña ne’ebé mak hau haknar-an ba, mesmu durante ne’e kolia hela kona-ba gender, maibé oinsa mak ita atu halo nia sai balansu diak liu tan ne’e presiza informasaun sira hanesan ne’e,” dehan Isabel Maria Fernandes de Jesus.

Programa ne’e oferese hosi governu Canada liu husi Center for Intercultural Learning nu’udar Canadian Foreign Service Institute, ne'ebe fasilita hosi Tracy Apoll no Valerie Stam. Treinamentu ne’e hala’o durante loron balun, iha salaun FOKUPERS, Farol, Dili, Timor-Leste. Tuir planu, iha loron 19/02 sei forneses mós treinamentu ne’e ba liñas ministeriais sira, loron 20/02 ba akademiku sira no iha loron 21/02 ba grupu sosiedade sivil.* [Martinho Moniz | TAFARA.TL | 18.02.2020].